വെസ്റ്റ്ഇന്ഡീസ് പര്യടനത്തിനുള്ള ടീമില്നിന്ന് കരുണ് നായരെ ഒഴിവാക്കിയതിനെ തുടര്ന്നുണ്ടായ വിവാദത്തില് കൈകഴുകി ഇന്ത്യന് ക്രിക്കറ്റ് ടീം നായകന് വിരാട് കോഹ്ലി. ടീമിലേക്ക് കളിക്കാരെ തെരഞ്ഞെടുക്കുന്നതു താനല്ലെന്നും സെലക്ടര്മാര് അവരുടെ ജോലി ചെയ്യുകയാണെന്നും കോഹ്ലി പറഞ്ഞു. ഇംഗ്ലണ്ട് പര്യടനത്തിനുള്ള ടെസ്റ്റ് ടീമില് കരുണിനെ ഉള്പ്പെടുത്തിയുന്നെങ്കിലും അഞ്ചു ടെസ്റ്റിലും അവസരം നല്കാതെ പുറത്തിരുത്തി. അഞ്ചാം ടെസ്റ്റില് ടീമിലേക്കു വിളിയെത്തിയ ഹനുമ വിഹാരിക്ക് അരങ്ങേറ്റത്തിന് അവസരം നല്കുകയും ചെയ്തു. വെസ്റ്റ്ഇന്ഡീസിനെതിരായ പരന്പരയില് കരുണിനെ ഉള്പ്പെടുത്തിയതുമില്ല. ഇതിനെതിരേ മുന് താരങ്ങള് രംഗത്തെത്തിയതോടെയാണ് വിവാദം ശക്തി പ്രാപിച്ചത്. ഇക്കാര്യത്തെക്കുറിച്ച് (കരുണിന്റെ ഒഴിവാക്കല് സംബന്ധിച്ച്) സെലക്ടര്മാര് സംസാരിച്ചതിനാല് ഇനി ഞാന് കൂടുതല് സംസാരിക്കാനില്ല. സെലക്ടര്മാര് അവരുടെ ജോലി ചെയ്യുന്നുണ്ട്. ഒഴിവാക്കപ്പെട്ട കളിക്കാരനോട് സെലക്ഷന് കമ്മിറ്റി തലവന് സംസാരിച്ചു കഴിഞ്ഞു. ഒരാള് സംസാരിച്ചു കഴിഞ്ഞതിനാല് വിഷയം ഇവിടെ പറയേണ്ട ആവശ്യമില്ല – വിന്ഡീസിനെതിരേ ആരംഭിക്കുന്ന പരന്പരയ്ക്കു മുന്നോടിയായി മാധ്യമങ്ങളെ കണ്ട കോഹ്ലി പറഞ്ഞു. കളിക്കാരുടെ സെലക്ഷന് തന്റെ ജോലിയല്ലെന്നും ഓരോ ടീമിലെ ഓരോ അംഗങ്ങള്ക്കും തങ്ങളുടെ ഉത്തരവാദിത്തം സംബന്ധിച്ചു വ്യക്തമായ ധാരണയുണ്ടെന്നും കോഹ്ലി കൂട്ടിച്ചേര്ത്തു.വെസ്റ്റ് ഇന്ഡീസിനെതിരായ ടീമില്നിന്ന് രോഹിത് ശര്മയടക്കമുള്ള താരങ്ങളെ മാറ്റിനിര്ത്തിയത് വിവാദമായിരുന്നു. ഏഷ്യാ കപ്പില് മികച്ച പ്രകടനം നടത്തിയിട്ടും രോഹിത് ശര്മയെ ടെസ്റ്റ് ടീമിലേക്കു മടക്കിവിളിക്കാത്തതില് വിമര്ശനവുമായി മുന് ക്യാപ്റ്റന് സൗരവ് ഗാംഗുലിയും ഹര്ഭജന് സിംഗും രംഗത്തെത്തി. ടീം തെരഞ്ഞെടുപ്പിന്റെ മാനദണ്ഡം എന്താണെന്നും ഇവര് ചോദ്യമുന്നയിച്ചു.