തമിഴ്നാട് മുഖ്യമന്ത്രിയെ വിമർശിച്ച കുറ്റത്തിന് കാർട്ടൂണിസ്റ്റ് അറസ്റ്റിൽ. ജി.ബാല എന്ന ചിത്രകാരനെയാണു പോലീസ് അറസ്റ്റ് ചെയ്തത്. കഴിഞ്ഞ മാസം 23ന് തിരുനൽവേലി കളക്ടറേറ്റിൽ കർഷക കുടുംബം തീകൊളുത്തി ജീവനൊടുക്കിയിരുന്നു. കൊള്ളപ്പലിക്കാരനിൽനിന്നു രക്ഷിക്കണമെന്ന് ആവശ്യപ്പെട്ട് കുടുംബം പലതവണ ഉദ്യോഗസ്ഥരെ സമീപിച്ചെങ്കിലും ഉദ്യോഗസ്ഥർ കുടുംബത്തിന്റെ ആവശ്യത്തിനു വിലകൽപ്പിച്ചില്ല. ഇതേതുടർന്നാണ് പൊതുജനം നോക്കിനിൽക്കെ കുട്ടികളടക്കം കുടുംബം ജീവനൊടുക്കാൻ ശ്രമിക്കുകയായിരുന്നു. കുടുംബനാഥനുൾപ്പെടെ നാലു പേരും ഇവിടെ വെന്തുമരിച്ചു. ഈ സംഭവത്തെ വിമർശിച്ചാണ് ബാല കാർട്ടൂണ് വരച്ചത്. കൊള്ളപ്പലിക്കാർക്കെതിരേ നടപടിയെടുക്കാൻ മടിക്കുന്ന മുഖ്യമന്ത്രിയടക്കമുള്ള സർക്കാർ സംവിധാനങ്ങളെ കാർട്ടൂണിൽ വിമർശിച്ചിരുന്നു.
ഇതിനെതിരേ തിരുനൽവേലി കളക്ടർ പോലീസിനെ സമീപിക്കുകയായിരുന്നു. കാർട്ടൂണ് വളരെ ആക്ഷേപകരമാണെന്നും ഇത് മുഖ്യമന്ത്രിയടക്കമുള്ള സർക്കാർ സംവിധാനങ്ങളെ അധിക്ഷേപിക്കലാണെന്നും പരാതിയിൽ ആരോപിച്ചിരുന്നു. ഇതേതുടർന്നാണ് പോലീസ് ബാലയെ അറസ്റ്റ് ചെയ്തത്.