കേന്ദ്രത്തിലെ നരേന്ദ്ര മോദി സര്ക്കാരും തെലുങ്കാനയിലെ ചന്ദ്രശേഖര് റാവുവിന്റെ ടിആര്എസ് സര്ക്കാരും ഒരുപോലെയാണെന്ന് കോണ്ഗ്രസ് അധ്യക്ഷന് രാഹുല് ഗാന്ധി. എന്ഡിഎയും ടിആര്എസും ഒരേരീതിയിലാണ് പ്രവര്ത്തിക്കുന്നതെന്നും രാഹുല് പറഞ്ഞു. രാജ്യത്തെ ഓരോ പൗരന്മാരുടേയും ബാങ്ക് അക്കൗണ്ടില് 15 ലക്ഷം രൂപ വീതം നിക്ഷേപിക്കുമെന്ന് മോദി വാഗ്ദാനം ചെയ്തിരുന്നു. ഇരട്ട കിടക്കമുറികളുള്ള വീട് നിര്മിച്ചു നല്കുമെന്നായിരുന്നു തെലുങ്കാന മുഖ്യമന്ത്രിയുടെ വാഗ്ദാനം. എന്നാല് രണ്ടു പേരും വാഗ്ദാനം മാത്രം നല്കി. ഇത് നിവര്ത്തിക്കപ്പെട്ടില്ലെന്നും രാഹുല് ആരോപിച്ചു. ഹൈദരാബാദിലെ സെരിലിംഗപ്പള്ളിയില് പൊതുയോഗത്തില് സംസാരിക്കുകയായിരുന്നു രാഹുല്. തെലുങ്കാന അഴിമതിയുടെ തലസ്ഥാനമായി മാറിയിരിക്കുകയാണെന്നും രാഹുല് ആരോപിച്ചു. ഒരു കുടുംബം ഭരിക്കുകയും അതേ കുടുംബം ഗുണഫലം അനുഭവിക്കുകയും ചെയ്യുന്നു. മറ്റാര്ക്കും ഇതിന്റെ ഗുണം ലഭിക്കുന്നില്ലെന്നും രാഹുല് പറഞ്ഞു. വരുമാനം ഇല്ലാതായതോടെ സംസ്ഥാനത്ത് കഴിഞ്ഞ നാല് വര്ഷത്തിനിടെ 4,000 കര്ഷകരാണ് ജീവനൊടുക്കിയത്. കര്ഷകരുടെ ഭൂമി തട്ടിപ്പറിച്ചു. ദളിത്, ആദിവാസി വിഭാഗങ്ങള്ക്ക് മൂന്നു ഏക്കര് ഭൂമി വീതം നല്കുമെന്നും ചന്ദ്രശേഖര് റാവു പറഞ്ഞിരുന്നു. എന്നാല് ഒന്നും സംഭവിച്ചില്ലെന്നും കോണ്ഗ്രസ് അധ്യക്ഷന് പറഞ്ഞു. രാജ്യത്ത് രണ്ടു കോടി തൊഴില് അവസരങ്ങള് ഉണ്ടാക്കുമെന്നാണ് പ്രധാനമന്ത്രി നരേന്ദ്ര മോദി വാഗ്ദാനം ചെയ്തിരുന്നത്. എന്നാല് ഇതിന്റെ ചെറിയ ശതമാനംപോലും നിറവേറ്റാന് മോദിക്കായില്ല. കഴിഞ്ഞ നാല് വര്ഷമായി ഒരു ലക്ഷം സര്ക്കാര് തസ്തികകള് ഒഴിഞ്ഞുകിടക്കുകയാണ്. എന്നാല് 10,000 തോഴില് മാത്രമാണ് നല്കാനായതെന്നും രാഹുല് ചൂണ്ടിക്കാട്ടി.