സൈനിക വേഷത്തില് മുഖ്യമന്ത്രി പിണറായി വിജയനെയും സംസ്ഥാനത്തെ ദുരിതാശ്വാസപ്രവര്ത്തനങ്ങളെയും അവഹേളിച്ച് സാമൂഹിക മാധ്യമങ്ങളില് വിഡിയോ പോസ്റ്റ് ചെയ്തയാളെക്കുറിച്ചു വ്യക്തമായ വിവരം ലഭിച്ചതായി പോലീസ്. പത്തനംതിട്ട കടമ്മനിട്ട സ്വദേശി കെ.എസ്. ഉണ്ണിക്കെതിരേ തിരുവനന്തപുരം സൈബര് പോലീസ് സ്റ്റേഷനില് കേസെടുത്ത് അന്വേഷണം തുടങ്ങി. കേരളം വിട്ട ഇയാള് വൈകാതെ പിടിയിലാകുമെന്നാണു പോലീസ് നല്കുന്ന വിവരം. ഡിഫെന്സ് സെക്യൂരിറ്റി കോര് വിഭാഗത്തില്നിന്നു വിരമിച്ച ശേഷം ടെറിട്ടോറിയല് ആര്മിയില് ജോലി നോക്കുന്ന ഉണ്ണിക്കെതിരെ തിരുവനന്തപുരം സൈബര് പോലീസ് സ്റ്റേഷനില് കേസ് രജിസ്റ്റര് ചെയ്തു. ആള്മാറാട്ടം, പൊതുജനശല്യം തുടങ്ങിയ വകുപ്പുകള് ഉള്പ്പെടുത്തിയാണ് ക്രൈം കേസ് രജിസ്റ്റര് ചെയ്തത്. വീഡിയോ സംബന്ധിച്ച് സൈബര് സെല്, സംസ്ഥാന പോലീസ് മേധാവി ലോക്നാഥ് ബെഹ്റയ്ക്ക് നല്കിയ റിപ്പോര്ട്ടിന്റെ അടിസ്ഥാനത്തില് കേസ് രജിസ്റ്റര് ചെയ്യാന് അദ്ദേഹം നിര്ദ്ദേശിക്കുകയായിരുന്നു. മുഖ്യമന്ത്രിയേയും സര്ക്കാരിനേയും ചോദ്യം ചെയ്ത് സൈനിക വേഷത്തില് സംസാരിക്കുന്ന വീഡിയോ കഴിഞ്ഞ ദിവസമാണ് സാമൂഹിക മാധ്യമങ്ങളില് പ്രചരിച്ചത്. ഇതേത്തുടര്ന്ന് ഇയാള് സൈനികനല്ലെന്നു കരസേനാ അഡീഷണല് ഡയറക്ടറേറ്റ് ജനറല് ഓഫ് പബ്ലിക് ഇന്ഫര്മേഷന് ട്വിറ്ററിലൂടെ അറിയിച്ചു. ദുരന്ത ബാധിത മേഖലയില് സൈന്യം രക്ഷാപ്രവര്ത്തനം നടത്തുന്നതിനിടെ ഇത്തരത്തിലുള്ള സന്ദേശങ്ങള് പ്രചരിപ്പിക്കരുതെന്നും വ്യക്തമാക്കിയിരുന്നു.