ഗുജറാത്തിലെ വഡോദരയിൽ സ്കൂളിലെ ശുചിമുറിയിൽ വിദ്യാർഥിയെ കൊല്ലപ്പെട്ട നിലയിൽ കണ്ടെത്തി. ഒമ്പതാം ക്ലാസ് വിദ്യാർഥിയായ പതിനാലുകാരനാണ് കൊല്ലപ്പെട്ടത്. വയറ്റിൽ കുത്തേറ്റ നിലയിലായിരുന്നു മൃതദേഹം. തലയ്ക്കും മുറിവേറ്റിരുന്നു. കൊലയ്ക്കു ഉപയോഗിച്ചതായി കരുതുന്ന കത്തിയും മൃതദേഹത്തിനു സമീപത്തുനിന്നും കണ്ടെത്തിയിട്ടുണ്ട്. വെള്ളിയാഴ്ച വഡോദരയിലെ ശ്രീ ഭാരതീയ വിദ്യാലയത്തിലായിരുന്നു സംഭവം. സ്കൂളിലെ തന്നെ 10 ാം ക്ലാസ് വിദ്യാർഥിയാണ് കൊലപാതകം നടത്തിയതെന്നു കരുതുന്നു. കൊല്ലപ്പെട്ട കുട്ടിയും ഈ വിദ്യാർഥിയും തമ്മിൽ വ്യാഴാഴ്ച വാക്കേറ്റം നടന്നിരുന്നു. 10 ാം ക്ലാസ് വിദ്യാർഥിയെ സംഭവത്തിനു ശേഷം കാണാതായി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. സ്കൂളിലെ സിസിടിവി ദൃശ്യങ്ങളുൾപ്പെടെ പോലീസ് പരിശോധിച്ചുവരികയാണ്. ഡൽഹി റയാൻ ഇന്റർനാഷണൽ സ്കൂളിൽ രണ്ടാം ക്ലാസ് വിദ്യാർഥി സമാന രീതിയിൽ കൊല്ലപ്പെട്ടിരുന്നു. ഗുരുഗ്രാമിലെ റയാൻ ഇന്റർനാഷണൽ സ്കൂളിലെ രണ്ടാംക്ലാസ് വിദ്യാർഥി പ്രദ്യുമൻ ഠാക്കൂറിനെ സെപ്റ്റംബർ എട്ടിനാണ് സ്കൂളിലെ ശുചിമുറിയിൽ കൊല്ലപ്പെട്ട നിലയിൽ കണ്ടെത്തിയത്. കേസിൽ അതേ സ്കൂളിലെ 11-ാം ക്ലാസ് വിദ്യാർഥി അറസ്റ്റിലാകുകയും ചെയ്തിരുന്നു.