ഉത്തര കൊറിയയുടെ ആണവായുധ പരീക്ഷണങ്ങൾക്ക് തടയിടാൻ സാമ്പത്തിക ഉപരോധം ശക്തമാക്കി യുഎസ്. ഉത്തര കൊറിയയുമായി ഇടപാടുകളുള്ള സ്ഥാപനങ്ങളിൽ നിന്ന് ബന്ധമൊഴിവാക്കാൻ യുഎസ് ട്രഷറിയെ അധികാരപ്പെടുത്തുന്ന പുതിയ ഉത്തരവിൽ പ്രസിഡന്റ് ഡോണൾഡ് ട്രംപ് ഒപ്പുവച്ചു. പ്യോഗ്യാംഗുമായുള്ള എല്ലാവിധ സാന്പത്തിക ഇടപാടുകളും നിർത്തണമെന്ന് ചൈന സെൻട്രൽ ബാങ്ക് മറ്റു ചൈനീസ് ബാങ്കുകൾക്ക് നിർദേശം നൽകിയിട്ടുണ്ടെന്നും ട്രംപ് പറഞ്ഞു.
ദക്ഷിണ കൊറിയൻ പ്രസിഡന്റ് മൂൺ ജേ ഇന്നുമായുള്ള കൂടിക്കാഴ്ചയ്ക്ക് മുന്പ് സംസാരിക്കുകയായിരുന്നു ട്രംപ്. വിനാശകരമായ ആയുധങ്ങള് വികസിപ്പിക്കാനുള്ള ഉത്തരകൊറിയ സാന്പത്തിക സ്രോതസുകളെ വിച്ഛേദിക്കാനാണ് നടപടികൾ എടുത്തതെന്ന് ട്രംപ് പറഞ്ഞു. ആണവായുധ, മിസൈൽ പരീക്ഷണങ്ങൾക്ക് വേണ്ടി ഉത്തരകൊറിയ അന്താരാഷ്ട്ര സാന്പത്തിക വ്യവസ്ഥിതിയെ ദുരുപയോഗപ്പെടുത്തുകയായിരുന്നുവെന്നും അദ്ദേഹം പറഞ്ഞു.
ഹൈഡ്രജൻ ബോംബ് പരീക്ഷണത്തിന്റെ പേരിൽ ഉത്തരകൊറിയയ്ക്ക് എതിരേ യുഎൻ രക്ഷാസമിതി പുതിയ ഉപരോധങ്ങൾ ഏർപ്പെടുത്തിയിട്ട് രണ്ടാഴ്ച പിന്നിടുന്പോഴാണ് അമേരിക്കയുടെ നീക്കം. പുതിയ ഉത്തരവ് ഒരേ ഒരു രാജ്യത്തെ മാത്രമാണ് ലക്ഷ്യമിടുന്നത്, അത് ഉത്തരകൊറിയയെ ആണെന്നും യുഎസ് പ്രസിഡന്റ് പറഞ്ഞു.