ഇന്ത്യക്കെതിരെ ആരോപണം ഉയർത്തിയ പാക് സ്ഥാനപതിക്ക് എട്ടിന്റെ പണി

pak 8

‘പാകിസ്​താൻ ഭീകരതയുടെ ഫാക്​ടറി’യെന്ന ഇന്ത്യന്‍ വിദേശകാര്യമന്ത്രി സുഷമ സ്വരാജി​​​​ന്റെ പ്രസംഗത്തിന് മറുപടി നല്‍കുന്നതിനിടെ ഐക്യരാഷ്ട്രസഭയിലെ പാക് സ്ഥാനപതി മലീഹാ ലോധി ഉയര്‍ത്തിക്കാട്ടിയത് തെറ്റായ ചിത്രം. കശ്​മീരിലെ പെല്ലറ്റ്​ ആക്രമണം ഇന്ത്യൻ ഭീകരതുടെ ഉദാഹരണമാണെന്ന്​ പറഞ്ഞ്​ മലീഹാ ലോധി മുഖത്താകെ പരിക്കേറ്റ യുവതിയുടെ ചിത്രം ഉയര്‍ത്തിക്കാട്ടിയത്​. എന്നാൽ ചിത്രം പെല്ലറ്റ്​ ആക്രമണത്തിൽ പരിക്കേറ്റ കശ്​മീരിയുടേതായിരുന്നില്ല. ലോധി ഉയര്‍ത്തിക്കാട്ടിയത് ഗാസയിൽ പരിക്കേറ്റ പെൺകുട്ടിയുടെ ചിത്രമായിരുന്നു.

കശ്മീരിലെ ജനങ്ങള്‍ പെല്ലറ്റ് തോക്കുകള്‍ക്ക് ഇരയാവുകയാണെന്ന് അവര്‍ ആരോപിച്ചു. ഇതാണ് ഇന്ത്യന്‍ ജനാധിപത്യത്തിൻറ മുഖമെന്നും ചിത്രം ഉയർത്തി കാണിച്ച്​ അവര്‍ കുറ്റപ്പെടുത്തി. എന്നാല്‍ ആരോപണം അവര്‍ക്ക് തിരിച്ചടിയായെന്ന് വാര്‍ത്താ ഏജന്‍സികൾ റിപ്പോര്‍ട്ട് ചെയ്തു. 2014 ൽ അവാർഡിനർഹമായ പ്രശ്​സ്​ത ഫോട്ടോഗ്രാഫർ ഹെയ്​ഡി ലെവിൻ​​​​ന്റെ ചിത്രമാണ്​ ലോധി കാണിച്ചത്​. ഇസ്രായേലി​​​​ന്റെ വ്യോമാക്രമണത്തിൽ മുഖത്ത്​ പരിക്കേറ്റ പതിനേഴുകാരിയുടെ ചിത്രമായിരുന്നു അതെന്നും മാധ്യമങ്ങള്‍ ചൂണ്ടിക്കാട്ടി.

യു. എന്‍ പൊതുസഭയുടെ എഴുപത്തിരണ്ടാം സമ്മേളനത്തില്‍ സംസാരിക്കവെ വിദേശകാര്യമന്ത്രി സുഷമ സ്വരാജ് കഴിഞ്ഞ ദിവസം പാകിസ്താനെതിരെ ആഞ്ഞടിച്ചിരുന്നു. ഇതിന് മറുപടി നൽകു​​മ്പോഴാണ്​ തെറ്റായ ചിത്രം ഉയര്‍ത്തിക്കാട്ടി പാക് സ്ഥാനപതി രംഗത്തെത്തിയത്.