റെയില്‍വേ സ്റ്റേഷനുകളുടെ സുരക്ഷ വര്‍ധിപ്പിക്കാന്‍ പദ്ധതി വരുന്നു. യാത്രക്കാരുടെ സുരക്ഷാ പരിശോധനകള്‍ കര്‍ശനമാക്കാന്‍ ഇന്ത്യന്‍ റെയില്‍വേ ഒരുങ്ങുന്നു. ട്രെയിന്‍ പുറപ്പെടുന്നതിന് 20 മിനിറ്റ് മുമ്പെങ്കിലും സ്റ്റേഷനിലെത്തി യാത്രക്കാര്‍ സുരക്ഷാ പരിശോധനകള്‍ പൂര്‍ത്തിയാക്കണം. വിമാനത്താവള മാതൃകയില്‍ ചെക്ക് ഇന്‍ രീതിയാണ് നടപ്പാക്കാൻ ഒരുങ്ങുന്നത്. പരിശോധനകള്‍ മൂലം യാത്ര വൈകാതിരിക്കാനാണ് നേരത്തെ എത്തണമെന്ന് നിര്‍ദേശിക്കുന്നതെന്ന് റെയില്‍വേ പ്രൊട്ടക്ഷന്‍ ഫോഴ്സ് ഡയറക്ടര്‍ ജനറല്‍ അരുണ്‍ കുമാര്‍ അറിയിച്ചു.
അലഹബാദ് റെയില്‍വേ സ്റ്റേഷനില്‍ ഉന്നത സാങ്കേതികവിദ്യ ഉപയോഗിച്ചുള്ള ഈ രീതി പരീക്ഷണാടിസ്ഥാനത്തില്‍ നടപ്പിലാക്കിയിട്ടുണ്ട്. ഈ മാസം പ്രയാഗ്‌രാജില്‍ കുംഭമേള ആരംഭിക്കുന്നതിനാല്‍ തിരിക്കു വര്‍ധിക്കാനുള്ള സാധ്യത പരിഗണിച്ചാണിത്. ആദ്യഘട്ടത്തില്‍ കര്‍ണാടകയിലെ ഹൂബ്ലി ഉള്‍പ്പെടെ 202 റെയില്‍വേ സ്റ്റേഷനുകളില്‍ പദ്ധതി നടപ്പാക്കുമെന്നും അരുണ്‍ കുമാര്‍ പറഞ്ഞു. റെയില്‍വേ സ്റ്റേഷനുകളുടെ സുരക്ഷ വര്‍ധിപ്പിക്കാന്‍ ലക്ഷ്യമിട്ടുള്ള പദ്ധതിയാണിത്. സ്റ്റേഷനുകളിലെ കവാടങ്ങളില്‍ ആര്‍പിഎഫ് ഉദ്യോഗസ്ഥരുടെ കാവല്‍ ഏര്‍പ്പെടുത്തും. യാത്രക്കാരുടെ പ്രവേശനം ഒരു കവാടത്തിലൂടെ മാത്രമാക്കി സുരക്ഷാ പരിശോധനകള്‍ നടത്തും. ഗേറ്റുകള്‍ വഴി കടക്കുന്നവരുടെ പരിശോധനയ്ക്ക് സാങ്കേതിക വിദ്യയുടെ സഹായം തേടുമെന്നും മന്ത്രാലയം പറഞ്ഞു.
2016ല്‍ അംഗീകാരം ലഭിച്ച ഇന്‍റഗ്രേറ്റഡ് സെക്യൂരിറ്റി സിസ്റ്റം(ഐഎസ്‌എസ്) സംവിധാനത്തിന്‍റെ ഭാഗമായാണ് പദ്ധതി. ഇതിന് 385.06 കോടി രൂപയാണ് ചെലവ് പ്രതീക്ഷിക്കുന്നത്. സിസിടിവി കാമറകള്‍, സ്ക്രീനിംഗ് സിസ്റ്റം, ബോംബ് കണ്ടെത്തുന്നതിനും നിര്‍വീര്യമാക്കുന്നതിനുമുള്ള ഉപകരണങ്ങള്‍ തുടങ്ങിയവ ഒരുക്കുമെന്നും റെയില്‍വേ അറിയിച്ചു. മുഖം തിരിച്ചറിയല്‍(ഫേസ് ഡിറ്റക്ഷന്‍) കാമറകളും സ്റ്റേഷനുകളില്‍ സ്ഥാപിക്കും. കുറ്റവാളികളെ കണ്ടെത്തുന്നതിനുള്ള ഫേസ് ഡിറ്റക്ഷന്‍ സോഫ്റ്റ്‌വെയര്‍ സംവിധാനം ആര്‍പിഎഫ് ഉദ്യോഗസ്ഥരുടെ പക്കലുണ്ടാകും.ഇതോടെ കുറ്റവാളികള്‍ യാത്ര ചെയ്യുന്നുണ്ടോ എന്ന് കണ്ടെത്താന്‍ കഴിയും. മുഖം തിരിച്ചറിയല്‍ പരിശോധനയ്ക്ക് എട്ടില്‍ ഒരാളെ വീതമേ വിധേയനാക്കൂവെന്നും മന്ത്രാലയം പറയുന്നു.
