ശബരിമല/മാളികപ്പുറം മേല്‍ശാന്തിയായി ബ്രാഹ്മണന്‍ മതിയെന്ന് തിരുവിതാംകൂര്‍ ദേവസ്വം ബോര്‍ഡ്. ശബരിമല, മാളികപ്പുറം മേല്‍ശാന്തി തസ്തികകളിലേക്ക് മലയാള ബ്രാഹ്മണര്‍ മാത്രം അപേക്ഷിച്ചാല്‍ മതിയെന്നതാണ് വിജ്ഞാപനം.ദേവസ്വം ബോര്‍ഡ് ക്ഷേത്രങ്ങളിലെ ഒരു നിയമനത്തിനും ജാതി പരിഗണന പാടില്ലെന്ന സുപ്രീംകോടതി ഉത്തരവും 2014 ലെ സംസ്ഥാന സര്‍ക്കാര്‍ ഉത്തരവും നിലനില്‍ക്കെയാണ് ദേവസ്വം ബോര്‍ഡ് പഴയ രീതി തന്നെ പിന്തുടരുന്നത്.
2002ലാണ് ദേവസ്വം നിയമനങ്ങളില്‍ ജാതിപരിഗണന പാടില്ലെന്ന് പറവൂര്‍ രാകേഷ് തന്ത്രിയുടെ കേസില്‍ സുപ്രീംകോടതി വിധിയുണ്ടായത്. തുടര്‍ന്ന് തിരുവിതാംകൂര്‍ ദേവസ്വം ബോര്‍ഡ് ശബരിമല ഒഴികെ മറ്റ് ക്ഷേത്രങ്ങളില്‍ ജാതി വ്യവസ്ഥ ഒഴിവാക്കി. ദേവസ്വം റിക്രൂട്ട്മെന്റ് ബോര്‍ഡ് രൂപീകരിച്ചശേഷം ജാതിപരിഗണനയില്ലാതെയാണ് ഇപ്പോള്‍ ദേവസ്വം ബോര്‍ഡുകളിലെ നിയമനങ്ങളെല്ലാം.
ശബരിമലയിലും മാളികപ്പുറത്തും മേല്‍ശാന്തി നിയമനം ഒരു വര്‍ഷത്തേക്കാണ്. സ്ഥിരനിയമനമല്ലാത്തതിനാല്‍ ഇത് ദേവസ്വം റിക്രൂട്ട്മെന്റ് ബോര്‍ഡിന്റെ പരിധിയില്‍ വരില്ല. ആ പഴുത് മുതലെടുത്താണ് ബോര്‍ഡ് പഴയ നിലപാട് തുടരുന്നത്.
