പ്രധാനമന്ത്രി നരേന്ദ്ര മോദിയുടെ ജീവിതകഥ പറയുന്ന സിനിമ “പിഎം നരേന്ദ്ര മോദി” കണ്ട്, പെരുമാറ്റചട്ട ലംഘനം നടന്നിട്ടുണ്ടോ എന്ന് വിലയിരുത്താന് തിരഞ്ഞെടുപ്പ് കമ്മീഷനോട് സുപ്രീംകോടതി.
ചിത്രത്തിനു വിലക്കേര്പ്പെടുത്തിയ തിരഞ്ഞെടുപ്പ് കമ്മീഷന്റെ നടപടിക്കെതിരേ ചിത്രത്തിന്റെ നിര്മ്മാതാക്കള് നല്കിയ ഹര്ജിയിലാണ് സുപ്രീംകോടതിയുടെ നിര്ദേശം. അഭിപ്രായ സ്വാതന്ത്ര്യത്തിന്റെ ലംഘനമാണ് കമ്മീഷന്റെ നടപടിയെന്ന് നിര്മ്മാതാക്കള് ഹര്ജിയില് ആരോപിച്ചു. ചീഫ് ജസ്റ്റിസ് രഞ്ജന് ഗോഗോയ് അദ്ധ്യക്ഷനായുള്ള ബെഞ്ചാണ് ഹര്ജി പരിഗണിച്ചത്. കഴിഞ്ഞ 10നാണ് സിനിമയുടെ പ്രദര്ശനം തിരഞ്ഞെടുപ്പ് കഴിയും വരെ തടഞ്ഞുകൊണ്ട് തിരഞ്ഞെടുപ്പ് കമ്മീഷന് ഉത്തരവിറക്കിയത്. നീതിയുക്തമായ തിരഞ്ഞെടുപ്പ് ഉറപ്പാക്കാനാണ് നടപടിയെന്നും കമ്മീഷന് അറിയിച്ചിരുന്നു.
ചിത്രം കണ്ടു വിലയിരുത്തിയശേഷം ഏപ്രില് 22ന് മുന്പ് തീരുമാനം മുദ്ര വച്ച കവറില് സമര്പ്പിക്കാനും സുപ്രീം കോടതി കമ്മീഷനോടു നിര്ദേശിച്ചു. ടിഡിപി സ്ഥാപകന് എന്.ടി. രാമറാവുവിനെ കുറിച്ചുള്ള ‘എന്ടിആര്’, തെലങ്കാന മുഖ്യമന്ത്രി കെ. ചന്ദ്രശേഖര റാവുവിനെ കുറിച്ചുള്ള ‘ഉദ്യമ സിംഹം’ തുടങ്ങിയ ചിത്രങ്ങള്ക്കും ഈ ഉത്തരവ് ബാധകമാണ്.
സിനിമയുടെ പ്രദര്ശനം നാളെ തന്നെ ഒരുക്കാമെന്ന് നിര്മ്മാതാക്കള് വ്യക്തമാക്കി.ഒമംഗ് കുമാര് സംവിധാനം ചെയ്ത ചിത്രത്തിന് യു സര്ട്ടിഫിക്കറ്റാണ് നല്കിയത്. ബോളിവുഡ് നടന് വിവേക് ഒബ്റോയിയാണ് ചിത്രത്തില് മോദിയുടെ വേഷം അവതരിപ്പിക്കുന്നത്. നരേന്ദ്രമോദിയുടെ പ്രധാനമന്ത്രി പദവിയിലേക്കുള്ള യാത്ര വരെയുള്ള ജീവിതമാണ് ചിത്രത്തിന്റെ ഇതിവൃത്തം. മോദിയുടെ രാഷ്ട്രീയ ജീവിതത്തിന്റെ തുടക്കം മുതല് 2014 ലെ തിരഞ്ഞെടുപ്പ് വിജയം വരെയാണ് ചിത്രം ദൃശ്യവത്കരിക്കുന്നത് എന്നാണ് സംവിധായകന് ചിത്രത്തെക്കുറിച്ച് പറയുന്നത്. 23 ഭാഷകളിലാണ് ചിത്രം ഇറങ്ങുന്നത്.