ഏറ്റവും വലിയ ചൈല്‍‍ഡ് പോണോഗ്രാഫി വെബ്സൈറ്റിന് പൂട്ടുവീണു. വെല്‍കം ടു വിഡിയോ എന്ന് സൈറ്റിനാണ് പൂട്ടുവീണത്. 2015 ജൂണില്‍ ആരംഭിച്ച്‌, ബിറ്റ്കോയിന് ഉപയോഗിച്ചു പ്രവര്‍ത്തിച്ചിരുന്ന രഹസ്യ സൈറ്റിന്റെ അഡ്മിനിസ്ട്രേറ്ററായ ദക്ഷിണ കൊറിയ സ്വദേശി ജോങ് വൂ സണ്ണിനെ അറസ്റ്റ് ചെയ്തു. ആയിരക്കണക്കിനു മണിക്കൂറുകള്‍ വരുന്ന എട്ടു ടെറാബൈറ്റ് ബാല ലൈംഗിക ദൃശ്യങ്ങളാണ് പിടിച്ചെടുത്തിരുന്നത്.
സൈറ്റിലെ അംഗങ്ങളായ 337 പേരെ 38 രാജ്യങ്ങളിലായി അറസ്റ്റ് ചെയ്തു. യുഎസില്‍ 92 പേര്‍ നിരീക്ഷണത്തിലാണ്. ഇവരില്‍ മിക്കവരും നിയമനടപടി നേരിടുന്നു. പോര്‍ണോഗ്രഫി വിഡിയോക്കായി ക്രൂരമായ ലൈംഗിക ആക്രമണങ്ങള്‍ക്കു വിധേയരായിരുന്ന 23 കുട്ടികളെ യുഎസ്, സ്പെയിന്‍, യുകെ എന്നീ രാജ്യങ്ങളില്‍നിന്നു കണ്ടെത്തി രക്ഷിച്ചു.
മയക്കുമരുന്ന്, പണം വാങ്ങിയുള്ള ലൈംഗികത തുടങ്ങിയ അനധികൃത ഇടപാടുകള്‍ക്കു കുപ്രസിദ്ധി നേടിയ ‘സില്‍ക്ക് റോഡ്’ എന്ന സൈറ്റ് 2013ല്‍ പൂട്ടിയശേഷം തഴച്ചുവളര്‍ന്നതാണു വെല്‍കം ടു വിഡിയോ. സില്‍ക്ക് റോഡിനു പകരമാകാന്‍ ‘വാള്‍ സ്ട്രീറ്റ് മാര്‍ക്കറ്റ്’, ‘വാള്‍ഹല്ല’ സൈറ്റുകള്‍ ശ്രമിച്ചെങ്കിലും ബാല ലൈംഗികത, വാടകക്കൊലയാളിയെ ലഭ്യമാക്കല്‍ എന്നീ കുറ്റങ്ങള്‍ ചുമത്തി നിര്‍വീര്യമാക്കിയിരുന്നു.
വെല്‍കം ടു വീഡിയോ സൈറ്റില്‍ നിന്ന് പ്രീടീന്‍ ഹാര്‍ഡ്‌കോര്‍’, ‘പീഡോഫൈല്‍’ തുടങ്ങിയ കീവേര്‍ഡുകള്‍ ഉപയോഗിച്ചിട്ടുള്ളതും മറ്റെവിടെയും ലഭ്യമല്ലാത്തതുമായ 2.5 ലക്ഷത്തിലധികം വിഡിയോ ഫയലുകളാണ് കണ്ടെത്തിയത്.
23 വയസ്സുള്ള ജോങ് വൂ സണ്‍ ആണ് സൈറ്റ് നടത്തിയിരുന്നതെന്നു കൊളംബിയയിലെ യുഎസ് ഡിസ്ട്രിക്‌ട് കോടതിയില്‍ സമര്‍പ്പിച്ച രേഖകളില്‍ വ്യക്തമാക്കുന്നു. ബാല ലൈംഗികതയുമായി ബന്ധപ്പെട്ട ഗൂഢാലോചന, നിര്‍മാണം, പരസ്യം, വിതരണം, പണം കൈമാറ്റം തുടങ്ങിയ ഒന്‍പതു കുറ്റങ്ങളാണ് സണ്‍ ഉള്‍പ്പെടെയുള്ള അംഗങ്ങള്‍ക്കെതിരെ ചുമത്തിയിട്ടുള്ളത്. 24 ബിറ്റ്കോയിന് അക്കൗണ്ടുകള്‍ പിടിച്ചെടുക്കാനും സര്‍ക്കാര്‍ നീക്കം തുടങ്ങിയിട്ടുണ്ട്.
