ശ്രീലങ്കയില് ഈസ്റ്റര് ദിനത്തിലുണ്ടായ സ്ഫോടന പരമ്പരകളുടെ പശ്ചാത്തലത്തില് ഇന്ത്യന് തീരങ്ങളില് അതീവ ജാഗ്രതാ നിര്ദേശം പുറപ്പെടുവിച്ചു. തീരസംരക്ഷണ സേനയാണ് ജാഗ്രതാ നിര്ദേശം നല്കിയത്. സ്ഫോടനത്തിനു പിന്നില് പ്രവര്ത്തിച്ചവര് ഇന്ത്യയിലേക്ക് കടക്കാനുള്ള സാധ്യതകള് പരിഗണിച്ചാണ് മുന്നറിയിപ്പ് നല്കിയിരിക്കുന്നത്. ഇന്ത്യന് മഹാസമുദ്രത്തില് കോസ്റ്റ് ഗാര്ഡ് നിരീക്ഷണം ശക്തമാക്കി. നിരീക്ഷണകപ്പലുകളും ആളില്ലാ വിമാനങ്ങളും സമുദ്രാതിര്ത്തിയില് നിരീക്ഷണം നടത്തി കൊണ്ടിരിക്കുകയാണെന്ന് കോസ്റ്റ് ഗാര്ഡ് അറിയിച്ചു. ഞായറാഴ്ച ഈസ്റ്റര് ദിനത്തില് ശ്രീലങ്കന് തലസ്ഥാനമായ കൊളംബോയില് നടന്ന സ്ഫോടന പരമ്പരകളില് 290ഓളം പേര് മരിച്ചതിന് പിന്നാലെയാണ് ഇന്ത്യയും ജാഗ്രത ശക്തമാക്കിയത്.
അതേസമയം സ്ഫോടനം നടന്ന ശ്രീലങ്കയില് അടിയന്താരവസ്ഥ പ്രഖ്യാപിച്ചു. സമൂഹമാധ്യമങ്ങള്ക്ക് ഏര്പ്പെടുത്തിയ നിരോധനം ഇപ്പോഴും തുടരുകയാണ്. ആക്രമണങ്ങള്ക്ക് പിന്നില് ശ്രീലങ്കയിലെ ഇസ്ലാമിക തീവ്രവാദി സംഘടനയായ ദ നാഷണല് തൗഹീത് ജമാ അത്ത് ആണെന്ന് സംശയിക്കുന്നതായി സര്ക്കാര് അറിയിച്ചു.സ്ഫോടനങ്ങള്ക്ക് പിന്നില് പ്രവര്ത്തിച്ച പലരേയും ഇതിനോടകം സുരക്ഷാ സേനകള് തിരിച്ചറിഞ്ഞിട്ടുണ്ട്. ഹോട്ടലുകളില് സ്ഫോടക വസ്തുകള് എത്തിച്ച വാഹനത്തിന്റെ ഡ്രൈവറടക്കം 24 പേരെ ആക്രമണവുമായി ബന്ധപ്പെട്ട് കസ്റ്റഡിയിലെടുത്തതായി സര്ക്കാര് വൃത്തങ്ങള് അറിയിച്ചു.