ശക്തമായ ത്രികോണ മത്സരം നടന്ന, ശബരിമല പ്രക്ഷോഭത്തിന്റെ കേന്ദ്രബിന്ദുവായ പത്തനംതിട്ടയില് 80 ശതമാനത്തിലധികം പോളിംഗ് നടന്നത് 160 ബൂത്തുകളില്. മണ്ഡലത്തിലെ റിക്കാര്ഡ് പോളിംഗിന്റെയും വോട്ടിംഗ് ശതമാനത്തിന്റെയും കണക്കുകള്ക്കൊപ്പമാണ് ഈ വിവരവും പുറത്തുവരുന്നത്. അടൂരിലെ മൂന്നാളം ഗവണ്മെന്റ് എല്പിഎസ് സ്കൂളിലെ 89-ാം നന്പര് ബൂത്തില് 100 ശതമാനമാണ് പോളിംഗ്. മണ്ഡലത്തില് 90 ശതമാനത്തിന് മുകളില് പോളിംഗ് നടന്ന ഏക ബൂത്തും ഇതുതന്നെ. 74.19 ശതമാനമാണ് ഇത്തവണത്തെ വോട്ടിംഗ് ശതമാനം. മണ്ഡല ചരിത്രത്തില് ആദ്യമായാണ് വോട്ടിംഗ് ശതമാനം 70 കടക്കുന്നത്. വോട്ട് ചെയ്തവരുടെ എണ്ണം 10 ലക്ഷം കടക്കുന്നതും ഇതാദ്യം. പോളിംഗ് ശതമാനം കൂടുതല് കാഞ്ഞിരപ്പള്ളിയിലും കുറവ് റാന്നിയിലുമാണ്. കാഞ്ഞിരപ്പള്ളിയില് 59 ബൂത്തുകളിലും പൂഞ്ഞാറില് 33 ബൂത്തുകളിലും അടൂരില് 44 ബൂത്തുകളിലും പോളിംഗ് 80 ശതമാനം കവിഞ്ഞു. തിരുവല്ലയില് നാലും റാന്നിയില് രണ്ടും കോന്നി, ആറന്മുള എന്നിവിടങ്ങളില് ഒന്പത് വീതം ബൂത്തുകളിലാണ് 80-ന് മുകളില് വോട്ടിംഗ് ശതമാനം എത്തിയത്.
മണ്ഡലത്തില് 60 ശതമാനത്തില് താഴെ വോട്ടിംഗ് രേഖപ്പെടുത്തിയത് നാലു ബൂത്തുകളില് മാത്രമാണ്. ഒരു ബൂത്ത് തിരുവല്ലയിലും മൂന്നു ബൂത്തുകള് റാന്നിയിലുമാണ്. 2014 ലോക്സഭാ തെരഞ്ഞെടുപ്പില് 92 ബൂത്തുകളിലായിരുന്നു 60 ശതമാനത്തില് താഴെ വോട്ടിംഗ് നടന്നത്. ജനസംഖ്യയില് സ്ത്രീകള് കൂടുതലുള്ള ജില്ലയാണ് പത്തനംതിട്ട. ആ മേധാവിത്വം വോട്ടുചെയ്യുന്നതിലും സ്ത്രീകള് നിലനിര്ത്തി. ആകെ വോട്ട് ചെയ്യപ്പെട്ടതില് പകുതിയിലധികവും സ്ത്രീകളുടെ വോട്ടാണ്. മണ്ഡലത്തില് ആകെയുള്ള 716884 വനിതാ വോട്ടര്മാരില് 531826 പേരും തങ്ങളുടെ സമ്മതിദാന അവകാശം വിനിയോഗിച്ചു. അതേസമയം 490934 പുരുഷന്മാര് മാത്രമാണ് ബൂത്തിലെത്തിയത്. ആകെ 661700 പുരുഷവോട്ടര്മാരാണ് മണ്ഡലത്തിലുള്ളത്. ഏഴു നിയമസഭാ മണ്ഡലങ്ങളില് പൂഞ്ഞാര് ഒഴികെയുള്ള എല്ലാ മണ്ഡലങ്ങളിലും സ്ത്രീ വോട്ടര്മാര്തന്നെയാണ് മുന്നില് നില്ക്കുന്നത്. 100 ശതമാനംപേര് വോട്ട് ചെയ്ത് ട്രാന്സ്ജെന്ഡര് വിഭാഗവും ശ്രദ്ധനേടി. കാഞ്ഞിരപ്പള്ളി, ആറന്മുള, അടൂര് മണ്ഡലങ്ങളില്നിന്ന് ഓരോരുത്തര്വീതം ആകെ മൂന്നു പേര്ക്കാണു ട്രാന്സ്ജെന്ഡര് എപ്പിക് കാര്ഡുണ്ടായിരുന്നത്.