ആ പഴയ ഇന്ത്യയെ ഒന്ന് തിരിച്ചു തരണമെന്നു മോദിയോട് കോണ്‍ഗ്രസ്. മോഷ്ടാവെന്ന് ആരോപിച്ച്‌ ജാര്‍ഖണ്ഡില്‍ മുസ്ലിം യുവാവിനെ മര്‍ദിച്ചു കൊലപ്പെടുത്തിയ സംഭവം ലോക്സഭയില്‍ ഉന്നയിക്കവെ രാജ്യസഭയിലെ പ്രതിപക്ഷ നേതാവ് ഗുലാംനബി ആസാദാണ് ഈ ആവശ്യമുന്നയിച്ചത്.
നിങ്ങള്‍ വിഭാവനം ചെയ്യുന്ന പുതിയ ഇന്ത്യ ഞങ്ങള്‍ക്ക് വേണ്ടെ വേണ്ട . ആ ഇന്ത്യ നിങ്ങള്‍ തന്നെ സൂക്ഷിച്ചോളൂ. ഞങ്ങള്‍ക്ക് ഹിന്ദുക്കളും മുസ്ലിംകളും സിക്കുകാരും ക്രിസ്ത്യാനികളും തമ്മില്‍ സ്നേഹവും സഹവര്‍ത്തിത്വവും നിലനിന്നിരുന്ന ആ പഴയ ഇന്ത്യ മതി. ആ ഇന്ത്യയില്‍ വെറുപ്പും ആള്‍ക്കൂട്ട കൊലപാതകങ്ങളും ഉണ്ടായിരുന്നില്ല. മനുഷ്യന്‍മാര്‍ പരസ്പരം വെറുക്കുന്നതാണ് പുതിയ ഇന്ത്യ- ഗുലാം നബി ആസാദ് പറഞ്ഞു.
ജാര്‍ഖണ്ഡ് അക്രമങ്ങളുടെയും ആള്‍കൂട്ട കൊലപാതകങ്ങളുടെയും വിരാജക പ്രദേശമായി മാറിക്കഴിഞ്ഞു. എല്ലാ ആഴ്ചകളിലും മുസ്ലിംകളും ദളിതുകളും കൊല്ലപ്പെടുന്നു. സബ്കാ സാത്, സബ്കാ വികാസ് എന്ന ആശയം നടപ്പാക്കണമെങ്കില്‍ രാജ്യത്ത് ജനങ്ങള്‍ ബാക്കിയുണ്ടാകണമെന്നും ആസാദ് പറഞ്ഞു. പ്രധാനമന്ത്രി നരേന്ദ്ര മോദിയുടെ സാന്നിധ്യത്തിലായിരുന്നു നബിയുടെ വിമര്‍ശനം.
പുതിയ ഇന്ത്യ സൃഷ്ടിക്കും എന്നത് പ്രധാനമന്ത്രി നരേന്ദ്ര മോദി തെരഞ്ഞെടുപ്പു പ്രചാരണ റാലികളില്‍ ഉയര്‍ത്തിയിരുന്ന സ്ഥിരം മുദ്രാവാക്യമായിരുന്നു. ഇതിനെ പരിഹസിച്ചാണ് കോണ്‍ഗ്രസിന്‍റെ പഴയ ഇന്ത്യ പ്രയോഗം.
