വിദേശ ഓണ്ലൈന് സൈറ്റുകളായ ആമസോണും ഫ്ലിപ്കാര്ട്ടും നടത്തുന്ന ഓഫര് പെരുമഴ നിയന്ത്രിക്കാന് നടപടിയുമായി കേന്ദ്രസര്ക്കാര്. ചെറുകിട നിക്ഷേപകരെ സഹായിക്കുന്നതിനായാണ് പുതിയ നീക്കമെന്നാണ് കേന്ദ്രസക്കാര് നല്കുന്ന വിശദീകരണം. ഓഫര് വില്പനകളെ നിയന്ത്രിക്കുന്ന പുതിയ വിദേശനിക്ഷേപ നിയമം പാലിക്കാന് ആമസോണും ഫ്ലിപ്കാര്ട്ടും ബാധ്യസ്ഥരാണെന്ന് വ്യവസായ മന്ത്രി പിയൂഷ് ഗോയല് കമ്ബനികളെ അറിയിച്ചു.
ഓണ്ലൈന് ഷോപ്പിങ് സൈറ്റുകളുടെ ഓഫര് വില്പനകള് നിയന്ത്രിക്കുന്നതിനായാണ് കഴിഞ്ഞ ഫെബ്രുവരിയില് കേന്ദ്രസര്ക്കാര് വിദേശനിക്ഷേപ നിയമം പാസാക്കിയത്. കടുത്ത വ്യവസ്ഥകളാണ് നിയമത്തില് കേന്ദ്രസര്ക്കാര് ഉള്പ്പെടുത്തിയിരിക്കുന്നത്. ഇ-കോമേഴ്സ് കമ്ബനികള്ക്ക് ഏതെങ്കിലും തരത്തില് ഓഹരി പങ്കാളിത്തമുള്ള കമ്ബനികളുടെ ഉല്പന്നങ്ങള്ക്ക് അവരുടെ തന്നെ ഓണ്ലൈന് സൈറ്റുകളിലൂടെ വിറ്റഴിക്കുന്നതിന് നിയമപ്രകാരം നിയന്ത്രണമുണ്ട്. ക്ലൗഡ് ടെല്, അപാരിയോ തുടങ്ങിയ കമ്ബനികളില് ഓഹരി പങ്കാളിത്തമുള്ള ആമസോണിനാണ് ഇത് കനത്ത തിരിച്ചടി നല്കുക.
ഇതിന് പുറമേ ഉല്പാദകരുമായി നേരിട്ട് കരാറിലേര്പ്പെട്ട് ഉല്പന്നങ്ങള് എക്സ്ക്ലുസീവായി ഓണ്ലൈന് സൈറ്റുകളിലൂടെ വിറ്റഴിക്കുന്നതും നിയമം നിയന്ത്രിക്കുന്നു. വിവിധ സ്മാര്ട്ട്ഫോണ് നിര്മാതാക്കളുമായി സഹകരിച്ച് ഓണ്ലൈന് ഷോപ്പിങ് സൈറ്റുകള് എക്സ്ക്ലൂസീവായി ഉല്പന്നങ്ങള് വിറ്റഴിക്കാറുണ്ട്. ഓണ്ലൈന് ഷോപ്പിങ് സൈറ്റുകള് വഴി വിറ്റഴിക്കുന്ന ഉല്പന്നങ്ങളില് 50 ശതമാനവും മൊബൈല് ഫോണുകളാണ്. അതേസമയം, കേന്ദ്രസര്ക്കാറിന്െറ നിര്ദേശത്തോട് ആമസോണോ ഫ്ലിപ്കാര്ട്ടോ ഇതുവരെ പ്രതികരിച്ചിട്ടില്ല.