രാജ്യത്ത് അഴിമതി നിറഞ്ഞ സർക്കാരിന്റെ കാര്യത്തിൽ ഒരു മത്സരം നടത്തിയാൽ യെദിയൂരപ്പ സർക്കാരിനായിരിക്കും ഒന്നാം സ്ഥാനമെന്ന് ബിജെപി ദേശീയ അധ്യക്ഷൻ അമിത് ഷാ. കർണാടക നിയമസഭാ തെരഞ്ഞെടുപ്പ് പ്രചാരണത്തിന്റെ ആദ്യഘട്ടത്തിൽ സിദ്ധരാമയ്യ സർക്കാരിനെതിരേ ആരോപണങ്ങൾ ഉന്നയിച്ച് നടത്തിയ പത്രസമ്മേളനത്തിനിടെയാണു അമിത് ഷായ്ക്കു നാക്കുപിഴ പറ്റിയത്. സുപ്രീംകോടതിയിൽനിന്നു വിരമിച്ച ഒരു ജഡ്ജി അടുത്തിടെ ഇങ്ങനെ പറഞ്ഞു. രാജ്യത്തെ ഏറ്റവും അഴിമതി നിറഞ്ഞ സർക്കാരാരെന്ന് മൽസരം നടത്തിയാൽ ഒന്നാം സ്ഥാനത്ത് യെദിയൂരപ്പ സർക്കാരായിരിക്കും- എന്നായിരുന്നു അമിത് ഷായുടെ പരാമർശം. സിദ്ധരാമയ്യ സർക്കാരെന്നാണ് ഉദ്ദേശിച്ചതെങ്കിലും പറഞ്ഞുവന്നപ്പോൾ അതു ബിജെപിക്കാരനായ യെദിയൂരപ്പ സർക്കാർ എന്നായിപ്പോയി. അദ്ദേഹം ഇതു പറഞ്ഞ ഉടനെ സമീപത്തിരുന്നയാൾ തിരുത്തിയെങ്കിലും പ്രസ്താവനയുടെ വിഡിയോ നിമിഷങ്ങൾക്കകം സമൂഹമാധ്യമങ്ങളിൽ വൈറലായി. മേയ് മാസം കർണാടകയിൽ നടക്കുന്ന നിയമസഭാ തെരഞ്ഞെടുപ്പിൽ യെദിയൂരപ്പയെ മുഖ്യമന്ത്രി സ്ഥാനാർഥിയായി ഉയർത്തിക്കാട്ടിയാണു ബിജെപി ജനവിധി തേടുന്നത്. വാർത്താ സമ്മേളനം നടക്കുന്പോൾ യെദിയൂരപ്പയും മറ്റൊരു നേതാവുമാണ് അമിത് ഷായ്ക്കൊപ്പം വേദിയിലുണ്ടായിരുന്നത്.