പ്രളയബാധിത പ്രദേശങ്ങളില് രക്ഷാപ്രവര്ത്തനത്തിന് നേതൃത്വം നല്കിയ മത്സ്യത്തൊഴിലാളികള്ക്ക് സര്ക്കാരിന്റെ ബിഗ്സല്യൂട്ട്. രക്ഷാപ്രവര്ത്തനത്തില് പങ്കാളിത്തം വഹിച്ച ഓരോബോട്ടിനും ഇന്ധനത്തിനു പുറമെ 3000 രൂപയും നല്കുമെന്ന് മുഖ്യമന്ത്രി പിണറായി വിജയന്. വാര്ത്താ സമ്മേളനത്തിലാണ് മുഖ്യമന്ത്രി ഇക്കാര്യം അറിയിച്ചത്. രക്ഷാപ്രവര്ത്തനത്തിനിടെ കേടുപാടുകള് പറ്റുകയോ തകരുകയോ ചെയ്ത ബോട്ടുകള്ക്ക് ന്യായമായ നഷ്ടപരിഹാരം നല്കും. ബോട്ടുകള് രക്ഷാപ്രവര്ത്തനത്തിനായി എങ്ങനെയാണോ എത്തിച്ചത് അതുപോലെ തന്നെ അവ തിരികെ എത്തിക്കുന്നതിനും നടപടികള് സ്വീകരിക്കുമെന്നും മുഖ്യമന്ത്രി അറിയിച്ചു. ദുരന്തമേഖലയില് സമാനതയില്ലാത്ത പ്രവര്ത്തനമാണ് മത്സ്യത്തൊഴിലാളികള് നടത്തിയത്. അവരെ അനുമോദിക്കാന് സര്ക്കാര് ആലോചിക്കുന്നുണ്ട്. മത്സ്യത്തൊഴിലാളികള്ക്ക് സ്വീകരണം നല്കാനാണ് പദ്ധതിയെന്നും പിണറായി വിജയന് പറഞ്ഞു. പത്തനംതിട്ടയിലെ പ്രളയബാധിതപ്രദേശങ്ങളില് രക്ഷാപ്രവര്ത്തനത്തിന് ഓഖി ദുരന്തത്തെ അതിജീവിച്ച മത്സ്യത്തൊഴിലാളികള് ഉള്പ്പെടെയാണ് നേതൃത്വം നല്കിയത്. തിരുവനന്തപുരം, കൊല്ലം, കണ്ണൂര്, തൃശൂര്, മലപ്പുറം, എറണാകുളം ജില്ലകളിലെ മത്സ്യത്തൊഴിലാളികളാണ് രക്ഷാപ്രവര്ത്തനത്തില് പങ്കെടുത്തത്. സൈന്യമെത്താത്ത, വെള്ളം മൂടിയ റോഡുകളിലൂടെയും പാടങ്ങളിലൂടെയും ചെറിയ റോഡുകളിലൂടെയുമെല്ലാം മത്സ്യത്തൊഴിലാളികള് വള്ളങ്ങളും ബോട്ടുകളുമോടിച്ചു ജീവന്രക്ഷാപ്രവര്ത്തനം നടത്തി. ഒഴുക്കില് ‘കമ്ബ’ കെട്ടിയും നീന്തിയും മത്സ്യത്തൊഴിലാളികള് തിരികെ പിടിച്ചത് നിരവധി ജീവനുകളാണ്. മത്സ്യത്തൊഴിലാളികളുടെ ധൈര്യവും വെള്ളത്തിലുള്ള പരിചയവും രക്ഷാപ്രവര്ത്തനം വേഗത്തിലാക്കി. ഹെലികോപ്റ്ററുകള് ഉപയോഗിച്ചുപോലും രക്ഷിക്കാന് കഴിയാതിരുന്നവരെ മത്സ്യത്തൊഴിലാളികള് സാഹസികമായാണ് രക്ഷപ്പെടുത്തിയത്.ആദ്യഘട്ടത്തില് സ്വന്തം പണം മുടക്കിയാണ് വണ്ടികളില് വള്ളങ്ങളുമായി മത്സ്യത്തൊളിലാളികള് കേരളത്തിന്റെ വിവിധ ഭാഗങ്ങളിലേക്ക് പാഞ്ഞത്. തിരുവന്തപുരത്തുനിന്നു മാത്രം അഞ്ഞൂറോളം മത്സ്യത്തൊഴിലാളികളും ഇരുന്നൂറ്റി അന്പതിലേറെ വള്ളങ്ങളും ബോട്ടുകളും രക്ഷാപ്രവര്ത്തനത്തില് പങ്കെടുത്തു. മത്സ്യത്തൊഴിലാളി സംഘടനകളുടെ പ്രാഥമിക കണക്കനുസരിച്ച് 600 യാനങ്ങളും 4,000 മത്സ്യത്തൊഴിലാളികളും രക്ഷാപ്രവര്ത്തനത്തില് പങ്കാളികളായി.