രാജ്യത്തെ കോടതികളില് 50 വര്ഷമായി തീരുമാനമാകാതെ കെട്ടിക്കിടക്കുന്നത് ആയിരത്തിലധികം കേസുകളെന്നു സുപ്രീംകോടതി ചീഫ് ജസ്റ്റിസ് രഞ്ജന് ഗോഗോയ് . 25 വര്ഷമായിട്ടും തീരുമാനമാകാതെ കെട്ടിക്കിടക്കുന്നത് രണ്ട് ലക്ഷത്തിലധികം കേസുകളാണെന്നും ഗുവഹാട്ടിയില് നടന്ന പൊതുപരിപാടിയില് സംസാരിക്കവെ അദ്ദേഹം പറഞ്ഞു.
രാജ്യത്തെ കോടതികളില് കെട്ടിക്കിടക്കുന്ന 90 ലക്ഷം സിവില് കേസുകളില് 20 ലക്ഷം എണ്ണത്തില് സമന്സ് പോലും കൈമാറിയിട്ടില്ല. 2.1 കോടി ക്രിമിനല് കേസുകളില് ഒരുകോടിയിലധികം കേസുകളിലും ഇതേ അവസ്ഥയാണ്- ചീഫ് ജസ്റ്റീസ് വ്യക്തമാക്കി. ഗോഹട്ടിയില് നടന്ന പൊതുപരിപാടിയില് സംസാരിക്കവേയാണ് അദ്ദേഹം ഇക്കാര്യങ്ങള് വെളിപ്പെടുത്തിയത്. രാജ്യത്താകമാനം 6,000 ജഡ്ജിമാരുടെ ഒഴുവുകള് നികത്താന് സുപ്രീംകോടതി തീരുമാനിച്ചിരുന്നെന്നും ഇതില് 4,000 ഒഴിവുകള് നികത്തിയെന്നും ചീഫ് ജസ്റ്റീസ് അറിയിച്ചു. ബാക്കിയുള്ളവയില് 1,500 ഒഴിവുകളില് നവംബര്- ഡിസംബര് മാസങ്ങളില് നിയമനം നടത്തുമെന്നും അദ്ദേഹം പറഞ്ഞു. രാജ്യത്തെ ഹൈക്കോടതികളിലാകെ 1,079 ജഡ്ജിമാരുടെ തസ്തികകളാണ് ഉള്ളതെന്നും ഇതില് 403 ഒഴിവുകളുണ്ടെന്നും അദ്ദേഹം പറഞ്ഞു.
ജഡ്ജിമാരുടെ വിമരമിക്കല് പ്രായം 65 വയസാക്കണമെന്ന തന്റെ ശിപാര്ശ കേന്ദ്രം അംഗീകരിക്കുമെന്നാണ് പ്രതീക്ഷ. അങ്ങനെയെങ്കില് അടുത്ത മൂന്ന് വര്ഷത്തേക്ക് ജഡ്ജിമാരുടെ വിരമിക്കല് മരവിപ്പിക്കേണ്ടി വരും. ആ മൂന്ന് വര്ഷം കൊണ്ട് ഈ 403 ഒഴിവുകളില് മികവുള്ള ജഡ്ജിമാരെ നിയമിക്കാനാകുമെന്നും അദ്ദേഹം പറഞ്ഞു.