ബിജെപി എംഎല്‍എയായിരുന്ന കുല്‍ദീപ് സെന്‍ഗാറിനെതിരെ ലൈംഗീക പീഡന പരാതി നല്‍കിയ പെണ്‍കുട്ടിക്കും കുടുംബത്തിനും ഡല്‍ഹിയില്‍ താമസസൗകര്യം ഒരുക്കാന്‍ കോടതി നിര്‍ദേശം. ഡല്‍ഹി കോടതിയാണ് നിര്‍ദേശം നല്‍കിയത്.
സ്വന്തം സംസ്ഥാനത്ത് താമസിക്കാന്‍ പെണ്‍കുട്ടിക്കും കുടുംബത്തിനും ഭയമായതിനാല്‍ ഡല്‍ഹിയില്‍ സൗകര്യമൊരുക്കണമെന്ന് യുപി സര്‍ക്കാര്‍ കോടതിയെ അറിയിച്ചതിനു പിന്നാലെയാണ് നടപടി.
ബുധനാഴ്ച എയിംസില്‍‌നിന്നും ഡിസ്ചാര്‍ജ് ചെയ്യപ്പെടുന്ന പെണ്‍കുട്ടിക്കും കുടുംബാംഗങ്ങളായ അമ്മ, രണ്ട് സഹോദരിമാര്‍, സഹോദരന്‍ എന്നിവര്‍ക്കും താല്‍ക്കാലികമായി എയിംസിലെ ജയപ്രകാശ് നാരായണന്‍ സെന്‍ററിലെ ഹോസ്റ്റലില്‍ താമസം ഒരുക്കണമെന്നാണ് ജില്ലാ ജഡ്ജി ധര്‍മേശ് ശര്‍മ നിര്‍ദേശിച്ചിരിക്കുന്നത്. ഉന്നാവോയില്‍ പെണ്‍കുട്ടി പീഡനത്തിനിരയായ കേസില്‍ ബിജെപി എംഎല്‍എ ആയിരുന്ന കുല്‍ദീപ് സിംഗ് സെന്‍ഗാര്‍ ഒന്നാം പ്രതിയാണ്.
മാനഭംഗ ക്കേസില്‍ അന്വേഷണം നടത്തണമെന്നാവശ്യപ്പെട്ട് യുപി മുഖ്യമന്ത്രിയുടെ ഓഫീസിനു മുന്നില്‍ പ്രതിഷേധം നടത്തിയതിന് പിന്നാലെയാണ് റായ്ബറേലിയില്‍ വച്ച്‌ പെണ്‍കു ട്ടിയും കുടുംബവും അഭിഭാഷകനും സഞ്ചരിച്ച കാര്‍ ദുരൂഹമായ സാഹചര്യത്തില്‍ അപകടത്തില്‍ പെട്ടത്.
അപകടത്തില്‍ പെണ്‍കുട്ടിയുടെ രണ്ടു ബന്ധുക്കള്‍ കൊല്ലപ്പെടുകയും പെണ്‍കുട്ടിക്കും അഭിഭാഷകനും ഗുരുതരമായി പരിക്കേല്‍ക്കുകയുമായിരുന്നു.
