കനത്ത മഴയില്‍ ദുരിതമനുഭവിക്കുന്ന വയനാട്ടിലെ ജനങ്ങള്‍ മാത്രമാണ് തന്റെ ചിന്തയിലും പ്രാര്‍ഥനയിലുമുള്ളതെന്ന് രാഹുല്‍ ഗാന്ധി എംപി. താന്‍ വയനാട്ടിലേക്ക് പുറപ്പെട്ടതായിരുന്നു.
എന്നാല്‍ തന്റെ സന്ദര്‍ശനം രക്ഷാപ്രവര്‍ത്തനത്തെ ബാധിക്കുമെന്ന് ഉദ്യോഗസ്ഥര്‍ നിര്‍ദേശിച്ചതിനാല്‍ യാത്ര മാറ്റി വയ്ക്കുകയായിരുന്നുവെന്നും രാഹുല്‍ ട്വീറ്റ് ചെയ്തു. വയനാട്ടിലേക്ക് പോവാന്‍ സമ്മതം കിട്ടിയാല്‍ അവിടെയെത്തുമെന്നും അദ്ദേഹം പറഞ്ഞു.
തന്റെ പ്രാര്‍ത്ഥനയും ചിന്തയും വയനാട്ടിലെ ദുരിതമനുഭവിക്കുന്ന മനുഷ്യരോടൊപ്പമുണ്ട്. മുഖ്യമന്ത്രി പിണറായി വിജയനോട് വയനാട്ടിലെ അവസ്ഥയെ കുറിച്ച്‌ സംസാരിച്ചെന്നും അദ്ദേഹത്തിന്റെ ശ്രദ്ധ അവിടേക്ക് ക്ഷണിച്ചെന്നും രാഹുല്‍ ഗാന്ധി പറഞ്ഞു.
പ്രളയ ദുരിതമനുഭവിക്കുന്ന വയനാട്ടിലെ മനുഷ്യര്‍ക്ക് സംസ്ഥാന സര്‍ക്കാര്‍ സാമ്ബത്തിക ആശ്വാസം നല്‍കുമെന്ന് പ്രതീക്ഷിക്കുന്നതായും രാഹുല്‍ ഗാന്ധി പറഞ്ഞു.
മുഖ്യമന്ത്രി പിണറായി വിജയനുമായി ഫോണില്‍ സംസാരിച്ചുവെന്നും രാഹുല്‍ പറഞ്ഞു. വയനാട്ടില്‍ കാര്യമായ ജാഗ്രത വേണമെന്നും മുഖ്യമന്ത്രിയോട് ആവശ്യപ്പെട്ടു. ദുരിതാശ്വാസവുമായി ബന്ധപ്പെട്ട കാര്യങ്ങള്‍ പരിശോധിക്കണമെന്നാവശ്യപ്പെട്ട് വയനാട്, കോഴിക്കോട്, മലപ്പുറം തുടങ്ങിയ ജില്ലകളിലെ കളക്ടര്‍മാരുമായും ഫോണില്‍ ബന്ധപ്പെട്ടിരുന്നുവെന്നും രാഹുല്‍ പറഞ്ഞു.
നേരത്തെ രാജ്യത്തെ പ്രളയ ബാധിത പ്രദേശങ്ങളില്‍ രക്ഷാ പ്രവര്‍ത്തനത്തിനിറങ്ങാന്‍ കോണ്‍ഗ്രസ് പ്രവര്‍ത്തകരോട് രാഹുല്‍ ഗാന്ധി ആവശ്യപ്പെട്ടിരുന്നു.
പ്രളയ ബാധിത സംസ്ഥാനങ്ങളായ മഹാരാഷ്ട്ര, കേരളം, ഗുജറാത്ത്, ബീഹാര്‍, ആസാം, ഒഡീഷ എന്നിവിടങ്ങളിലെ മനുഷ്യര്‍ക്ക് സാധ്യമായ എല്ലാ സഹായങ്ങളും ചെയ്തു കൊടുക്കാനാണ് രാഹുല്‍ ഗാന്ധിയുടെ ആഹ്വാനം.
