തൊണ്ടയാട് ബൈപാസ് ജങ്ഷനു സമീപം മെഡിക്കല്‍ കോളജ് റോഡില്‍ സ്വകാര്യ ബസ് നിയന്ത്രണം വിട്ട് തലകീഴായി മറിഞ്ഞ് നിരവധി യാത്രക്കാര്‍ക്ക് പരിേക്കറ്റു. വെള്ളിയാഴ്ച രാവിലെ 10ന് മുക്കത്തുനിന്ന് നഗരത്തിലേക്ക് അമിതവേഗത്തില്‍ വന്ന ‘എലന്‍ട്ര ആക്ടേഴ്സ്’ എന്ന ബസാണ് ഡിവൈഡര്‍ തകര്‍ത്ത് എതിര്‍ദിശയില്‍ കടന്ന് റോഡിന് കുറുകെ ടയറുകള്‍ മുകളിലേക്കായി മറിഞ്ഞത്.
തലകീഴായി റോഡില്‍ നിരങ്ങിയ ബസ് എതിര്‍ദിശയില്‍ നിര്‍ത്തിയ ടിപ്പര്‍ ലോറിയിലിടിച്ചുനിന്നതിനാല്‍ കടകളും റോഡരികിലുള്ളവരും രക്ഷപ്പെട്ടു. ലോറിയിലുള്ള ഹോളോബ്രിക്സ് റോഡില്‍ പൊടിഞ്ഞു ചിതറി. ട്രാഫിക് സിഗ്നല്‍ ചുവപ്പ് ലൈറ്റാകുന്നതിനു മുമ്ബ് കയറിപ്പറ്റാന്‍ അമിതവേഗത്തില്‍ എടുത്തപ്പോള്‍ തൊണ്ടയാട് ഇറക്കത്തില്‍ ബസ് നിയന്ത്രണം വിടുകയായിരുന്നുവെന്ന് ദൃക്സാക്ഷികള്‍ പറഞ്ഞു. വണ്ടിയുടെ അഞ്ച് ടയറുകളും തേഞ്ഞുതീര്‍ന്ന നിലയിലാണ്. ബസ് നിരത്തിലിറക്കുന്നതിനുള്ള ഫിറ്റ്നസ് സര്‍ട്ടിഫിക്കറ്റും ഡ്രൈവറുടെ ലൈസന്‍സും പ്രാഥമിക നടപടിയെന്ന നിലയില്‍ റദ്ദാക്കുമെന്ന് സ്ഥലത്തെത്തിയ ആര്‍.ടി.ഒ എ.കെ. ശശികുമാര്‍ അറിയിച്ചു.
സ്പീഡ് ഗവേര്‍ണര്‍ ബസിനുണ്ടായിരുന്നോ എന്ന കാര്യവും പരിശോധിക്കും. പരിക്കേറ്റ 28 പേരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് മെഡിക്കല്‍ കോളജ് റോഡില്‍ ഒരു മണിക്കൂറോളം ഗതാഗതം സ്തംഭിച്ചു. നഗരത്തിലെ വിവിധ സ്േറ്റഷനില്‍നിന്ന് പൊലീസും ബീച്ച്‌, മീഞ്ചന്ത ഫയര്‍ഫോഴ്സും നാട്ടുകാരും ചേര്‍ന്ന് ക്രെയിനുപയോഗിച്ച്‌ ബസ് എടുത്തുമാറ്റി. 11.20ഓടെയാണ് ഗതാഗതം പുനഃസ്ഥാപിച്ചത്.
ഓയിലും മറ്റും പടര്‍ന്ന റോഡ് ഫയര്‍ഫോഴ്സ് കഴുകി വൃത്തിയാക്കി. മെഡിക്കല്‍ കോളജ് സി.ഐ മൂസ വള്ളിക്കാടന്‍, സി.ഐ ശംബുനാഥ്, ജില്ല ഫയര്‍ ഓഫിസര്‍ ടി. രജീഷ്, സ്േറ്റഷന്‍ ഓഫിസര്‍ വിശ്വാസ്, അസി. സ്േറ്റഷന്‍ ഓഫിസര്‍ പി.കെ. മുരളീധരന്‍, പി.കെ. ബഷീര്‍, ലീഡിങ് ഫയര്‍മാന്‍ പി.വി. പൗലോസ്, വിജു പ്രസാദ്, സനല്‍, മൂര്‍ത്തി തുടങ്ങിയവര്‍ രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി.
